एमालेले टुंगो लगायो राष्ट्रियसभाका उम्मेद्वारको नाम
भक्तपुर / नेकपा एमालेले राष्ट्रियसभाका लागि प्रदेश नम्बर ५, ६ र ७ का उम्मेदवारको टुंगो लगाएको छ ।
गायिका कोमल वलीलाई राष्ट्रियसभामा पठाउने भएको छ । पार्टी अध्यक्ष केपी शर्मा ओलीको बालकोटस्थित निवासमा बसेको स्थायी समितिको बैठकले राष्ट्रियसभाका लागि प्रदेश नम्बर ५, ६ र७ का उम्मेदवारको टुंगो लगाएको हो । गायिका वलीलाई प्रदेश ५ को महिला सदस्यमा उम्मेदवार बनाउने निर्णय भएको सचिव प्रदीप ज्ञवालीले जानकारी दिनु भएको छ । वली चुनावको केही अघि एमाले प्रवेश गर्नु भएको थियो । राप्रपाबाट एमाले प्रवेश गर्नुभएकी उहाँले प्रतिनिधिसभा सदस्यको टिकट नपाएपछि वागी उम्मेदवारी समेत दिनुभएको थियो । तर, एमाले नेतृत्वले फिर्ता गराएका थिए । १, २, ३ र ४ नम्बर प्रदेशका उम्मेदवारहरू भने छनोट हुन बाँकी रहेको जनाइएको छ । वाम गठबन्धनले ४३ सिटको भागवण्डा गरेको छ, जसमा २९ एमालेको भागमा परेको छ । बाँकी उम्मेदवार आज चयन गरिने बताइएको छ ।
