लगानीमैत्री वातावरण निर्माण गर्न स्थानीय तहसँग माग
भक्तपुर, ३० पुस । भक्तपुरका उद्योगी/व्यवसायीहरुले लगानीमैत्री वातावरण निर्माण गर्न स्थानीय तहसँग माग गरेका छन् ।
भक्तपुर उद्योग वाणिज्य संघका अध्यक्ष केपी अवालले सरकार र स्थानीय तहले पूर्वाधारको विकास नगरेकै कारण भक्तपुरको उद्योगधन्दा फष्टाउन नसकेको गुनासोसमेत गर्नुभयो । उहाँले पूर्वाधारको क्षेत्रका लगानी गरेमात्रै उद्योग व्यवसायमा लगानी भित्रयाउन सहज हुने पनि स्पष्ट पार्नुभयो । आज भक्तपुरमा आयोजित संचारकर्मीसँगको अन्तरक्रिया कार्यक्रममा बोल्दै अध्यक्ष अवालले लगानी मैत्री वातावरणको अभावमा भक्तपुरमा पर्यटन उद्योगसमेत सोचेअनुसार अघि बढ्न नसकेको पनि बताउनुभयो । अध्यक्ष अवालले भक्तपुरमा उद्योग व्यवसाय फष्टाउन स्थानीय तहले सोही अनुसारको कार्ययोजना बनाउनुपर्ने धारणासमेत राख्नुभयो ।
